ជារឿងមួយគួរឱ្យភ្ញាក់ផ្អើលជាខ្លាំងសម្រាប់ទស្សនិកជន ជាពិសេសអ្នកគាំទ្រលោក ខេមរៈ សិរីមន្ត ព្រោះនៅសុខៗ តារាល្បីឈ្មោះរូបនេះ បានប្រកាសថាខ្លួនមានប្រពន្ធ និងកូន ៣ហើយមកទល់នឹងពេលនេះ។ ទាំងនេះខុសស្រឡះពីពេលកន្លងទៅ លោកមិនដែលទទួលស្គាល់ថា មានប្រពន្ធ និងកូនបែបនេះឡើយ។
តារាចម្រៀង ខេមរៈ សិរីមន្ត បានសរសេរលើបណ្ដាញសង្គម Facebook ផ្លូវការរបស់ខ្លួនថា លោកបានរៀបការតាំងពីឆ្នាំ២០០៩ មកម្ល៉េះ ហើយមកទល់នឹងពេលនេះលោកមានកូន ៣នាក់ហើយ។ ទាំងនេះខុសពីពេលថ្មីៗកន្លងទៅ ដោយសារព័ត៌មាន និងអ្នកគាំទ្ររបស់លោក ដឹងថា លោកមានកូនតែពីរនាក់ប៉ុណ្ណោះ ប្រុសម្នាក់ និងស្រីម្នាក់ ដែលមានឈ្មោះថា ស្នេហ៍ និងឈ្មោះ ស្រ្តី។ ក៏ប៉ុន្តែតារាចម្រៀងរូបនេះ អាចនឹងមានកូនម្នាក់ទៀត ទើបលោកប្រកាសថា មានកូន ៣នាក់ដូច្នេះ។
យ៉ាងណាក៏ដោយមានហេតុផលសំខាន់ៗ ៤យ៉ាងអាចឱ្យតារាល្បីឈ្មោះរបស់ផលិតកម្ម រស្មីហង្សមាសរូបនេះ ព្រមទទួលស្គាល់ថាខ្លួនពិតជាមានភរិយា និងកូន ៣នាក់បែបនេះ។
ហេតុផលទី១ ទទួលស្គាល់មាន ភរិយា និងកូន ដើម្បីបញ្ចប់ការឆ្គឹះឆ្គៀលតទៅទៀតពីសំណាក់អ្នកព័ត៌មាន។ បណ្ដាសារព័ត៌មាននានា តែងសរសេរវាយប្រហារជាច្រើនឆ្នាំមកហើយ ចំពោះការលាក់បាំង មានភរិយា និងកូន ពីសំណាក់លោក ខេមរៈ សិរីមន្ត ដូច្នេះការទទួលស្គាល់នេះ អាចកាត់បន្ថយ មិនសូវមានព័ត៌មានលេចឮតទៅទៀត ចៀសវាងការឈឺក្បាលពីមួយថ្ងៃទៅមួយថ្ងៃ។
ហេតុផលទី២ មើលឃើញគន្លងកំពូលតារាចម្រៀងលោក ព្រាប សុវត្ថិ និងលោក ឆាយ វីរៈយុទ្ធ។ មានតារាខ្មែរជាច្រើនរូបមិនថាតែ ខេមរៈ សិរីមន្ត ទេ ដែលតែងលាក់បាំងរឿងមានកូន និងភរិយា ព្រោះតែពួកគេភាគច្រើនយល់ថា ការប្រកាសមានភរិយា និងកូន អាចធ្វើឱ្យប្រជាប្រិយភាពរបស់ពួកគេធ្លាក់ចុះ។ ក៏ប៉ុន្តែការមើលឃើញកន្លងលោក ព្រាប សុវត្ថិ នៅតែល្បីល្បាញ ក្រោយពីលោកមិនលាក់បាំងព័ត៌មានពីការមានប្រពន្ធ និងកូន និងថ្មីៗនេះ តារាចម្រៀងលោក ឆាយ វីរៈយុទ្ធ បានរៀបអាពាហ៍ពិពាហ៍ជាសាធារណៈ ហើយកេរ្តិ៍ឈ្មោះតារាទាំងពីរដួងនេះនៅតែល្បីល្បាញ ទទួលការគាំទ្រពីទស្សនិកជន។ ការមើលឃើញបែបនេះហើយធ្វើឱ្យលោកសម្រេចចិត្តទទួលស្គាល់ថាខ្លួនមានប្រពន្ធ និងកូនដែរ ហើយគិតថាកេរ្តិ៍ឈ្មោះខ្លួននៅតែល្បីល្បាញ។
ហេតុផលទី៣ មានការឱ្យយោបល់ពីមនុស្សសំខាន់ណាម្នាក់ ដើម្បីបើកផ្លូវភរិយា និងគ្រួសារ ពេញមុខពេញមាត់ក្នុងសង្គម។ រយៈពេលជិត ១០ឆ្នាំមកហើយ ដែលតារាល្បីឈ្មោះរូបនេះ លាក់បាំងការរៀបអាពាហ៍ពិពាហ៍របស់ខ្លួន រហូតដល់សារព័ត៌មានខ្លះចុះផ្សាយថា នារីម្នាក់ដែលតែងតែទៅណាមកណាស្និទ្ធជាមួយលោក ជាពិសេសតាមកម្មវិធីប្រគំតន្ត្រីនានា គឺជាភរិយា តែលោកតែងបដិសេធ។ ដូច្នេះការឱ្យយោបល់ពីមនុស្សសំខាន់ណាម្នាក់ ដើម្បីឱ្យនាងទៅណាមកណាពេញមុខ គឺជាការលើកកម្ពស់ និងផ្ដល់តម្លៃដល់ភរិយា បានលាក់បាំងយូរមកហើយ។
ហេតុផលទី៤ ខ្លាចព័ត៌មាននៃការមានភរិយា និងកូន កាន់តែផ្ទុះខ្លាំងអាចនឹងមានបញ្ហាកាន់តែជ្រៅថែមទៀត ដូច្នេះហើយទើបប្រកាសទទួលស្គាល់តែម្ដងដើម្បីឱ្យអស់ចម្ងល់។ មួយរយៈចុងក្រោយបណ្ដាសារព័ត៌មាននានា បានចុះផ្សាយជាបន្តបន្ទាប់ពីរឿងលាក់បាំងព័ត៌មាន ភរិយា និងកូនរបស់តារាល្បីឈ្មោះលោក ខេមរៈ សិរីមន្ត រហូតមានសារព័ត៌មានក្នុងស្រុកមួយចុះថា លោកគម្រាមប្ដឹង អ្នកទម្លាយរូបភាពប្រពន្ធ និងកូននោះថែមទៀត។ ចៀសវាង ព័ត៌មានបែកធ្លាយខ្លាំង និងគ្មានប្រយោជន៍ លោកប្រកាសទទួលស្គាល់ការពិតតែម្តែងទៅ។
ពាក់ព័ន្ធការទម្លាយរឿងរ៉ាវផ្ទាល់ខ្លួនដែលខំទាក់ទុកជាយូរឆ្នាំនេះ តារាចម្រៀងល្បីឈ្មោះលោក ខេមរៈ សិរីមន្ត មិនអាចសុំការបំភ្លឺបន្ថែមបានទេនាពេលនេះ។ យ៉ាងណាការលើកឡើងនេះ គឺជាទំនួលខុសត្រូវមួយដ៏ល្អ ក្នុងនាមជាឪពុក និងប្ដីដ៏ល្អ ព្រមទាំងគំរូសម្រាប់អ្នកគាំទ្ររបស់ខ្លួន ក្នុងនាមជាតារាឈានមុខម្នាក់ក្នុងប្រទេសកម្ពុជា។ លោក ខេរៈ សរីមន្ត បានចាកចេញពីផលិតកម្ម សាន់ដេ ទៅកាន់ផលិតកម្ម រស្មីហង្សមាស កាលពីពេលថ្មីៗ។ ប្រជាប្រិយភាពរបស់លោកនៅតែទទួលការគាំទ្រពីទស្សនិកជនដដែល ព្រោះតែបទចម្រៀងរបស់លោកជាច្រើនបទក្នុងផលិតកម្ម រស្មីហង្ស ជាទីពេញនិយមសម្រាប់ទស្សនិកជន៕
No comments:
Post a Comment